話說今日電腦節傳媒導覽，版主 Keith 就做代表去咗參加呢個 event，影咗一堆電腦節攤位嘅相畀我哋睇，睇完嘩一聲，然後繼續做自己嘢算。無嘅，可能因為聽日先開始，今日見到嘅價錢，應該唔會係聽日實際嘅價錢。然後就留意到，有檔 SmarTone 攤位，就 show 咗佢哋有個無限數據 Plan 優惠喎，係咪真係抵呢？我就搵相熟嘅街站朋友了解過，似乎街站仲抵得多！想知詳情，睇下文啦！
版主 Keith 影張相上面，寫住 4.5G 全速數據，有限時優惠，$220 有 6GB 再加送 FUP 無限上網，即係 6GB 之後可以全速繼續使用，但優先次序就可能會被調低。咁都叫做 $220 真無限上網，還好啦，睇返 CMHK，出名平價都係 $188 20GB 無限上網，雖然一個 6GB 一個 20GB，不過我就覺得，只要都係全速無限，其實唔差太遠。至少一個用 CMHK，一個用 SmarTone，叫做係兩個網絡商嘅選擇。
不過，我就將張相 Send 畀相熟嘅街站 Sales 睇，而 Sales 就表示，其實佢哋仲抵啦！原來，街站佢哋做緊「口爆價」，$188 就有 20GB FUP 無限數據 (另需付 $18 行政費)，即係用完 20GB 仲可以繼續全速無限上網，只係優先次序可能會被調低，咁同電腦節果個咪一鬼樣？而且街站 $188 基本數據仲有 20GB，似乎比電腦節 $220 得 6GB 更抵玩。不過，Sales 朋友都表示，呢個 Plan 佢哋係有每日 Quota，即係佢哋每日最多可以出到幾多張 SIM，係有限制，每日唔同，20 / 30 / 40 張不等。$188 20GB 數碼通真無限上網，又係咪抵玩呢？留言討論一下啦！
轉載自：https://m.eprice.com.hk/mobile/talk/3149/218656/1/